Oster-Weekend

Ja wo fange mer den am beschte ah?

Nach dem mir die churzi Wuche super gnosse händ und alli wieder Gsund gsi sind hämmer üs au richtig uf Oschtere gfreut, sind ja die erschte wo de chli go sueche chan :-) De Fritig isch gmüetlich gsi und nebed enem grosse Spaziergang mit Cache sueche und finde isch er eifach super gsi. Am Abe denn nichts ahnend is Bett, de chli isch igschlafe wie immer. Doch um halbi zwölfi schreit er wie am spiess. Ich bin so verschrocke, han grad gmerkt das da öpis nid stimme chan, also zu ihm über und als ich ihn aglange han isch es klar gsi. Er hät hohs Fieber, denn er hät glüet wie e heizig... De Fiebermesser hämmer au brucht doch leider uf STirnmessig igstellt gsi und so hät er üs 40°C azeigt, was nid ganz stimme cha, da mir ja im Ohr gmesse händ :-( somit wüssemer leider nid wie höch Fieber würkli gsi isch. Er hät gschraue und sich immer wieder ad Bruscht glange... So hämmer ihn bis uf Windle abzoge und bi üs is Bett gno. Denn hämmer alli chli chöne schlafe. Er isch immer  wieder Wach worde, da sini Nase gloffe isch und am vieri am morge hät er sich leider au no übergäh... Am morge isch er denn biz besser zweg gsi und so simmer am Namittag doch zum Grosspapi vom Nahuel gfahre. Er isch aber hauptsächlich bi üs glege und hät viel gschlafe, was natürlich super isch.

 

Am Sunntig morge isch de chli Maa denn au scho wieder fit gsi :-)

So hämmer am Namittag denn zwei lässigi Oschternäschtli chöne suech gha und de chli Maa hät sie au schnell gfunde und ganz viel Schoggi verdruckt, wie sich so ghört a Ostere :-)

 

De Mäntig isch au ganz genial gsi, denn de Nono und Mägi sind verbi cho und hät mit üs chöcherlet. De chli hät mit ihne gspielt und sini Luune verbreitet. Wo es denn aber is Bett gheisse hät isch de chli völlig ustickt! Er hät nur no gschraue und hät sich gar nid wele beruhige, zu allem überfluss isch er au zweimal usem Bett kletteret und vor de Türe gstande :-(( (jetzt fangt das au no ahh :-) naja mit Positive Gedanke sind mir denn is Bett, doch um halbi zwölfi isch üsi schlafens Ziit verbi gsi :-( und das leider bis am viertel vor drü!!!!

 

Mir sind alli Nudelfertig und total kaputt vo dere Nacht.

Hoffe nur das die kommende Nächt wieder besser werdet, bitte bitte....


Kommentar schreiben

Kommentare: 0